Í desember 2011 barst svar frá ESA vegna kvörtunar Hagsmunasamtaka heimilanna, Samtaka lánþega og hóps einstaklinga sem gerðust beinir aðilar að kvörtuninni. Í stuttu máli var svarið á þá lund að ESA tæki ekki afstöðu og vísaði málinu frá. Kvörtunaraðilum var gefinn um mánuður til að gera athugasemdir sem var og gert. Endanlegur úrskurður ESA barst okkur um 7. mars eða svo og er hann á sama veg og áður. ESA var ekki haggað til að taka efnislega afstöðu til kvörtunarinnar og taldi umkvörtunaratriðin ekki falla undir umsýslusvið stofnunarinnar.

Hagsmunasamtök heimilanna biðja félagsmenn velvirðingar á seinni birtingu á svarinu en miklar annir stjórnarmanna valda því að það verður að forgangsraða vinnu. Niðurstaða ESA veldur stjórn HH vonbrigðum eins og gefur að skilja. Segjast verður eins og er að vægi úrskurðar ESA í þróun mála hefur þó minnkað af ýmsum ástæðum. Innlendir dómstólar og þá sérstaklega Hæstiréttur Íslands hefur tekið á einstökum vafaatriðum en reyndar vantar enn að reyni á neytendarétt svo heitið geti.
Í svari ESA er látið sem svo að kvartað hafi verið yfir einkaaðilum þ.e. fjármálastofnunum en það er eingöngu túlkun ESA og við fáum engan botn í þá niðurstöðu satt best að segja. Bent var á í kvörtuninni hvernig fjármálastofnanir gengu á lagið en kvörtunin beindist ótvírætt gegn Alþingi, dómsvaldi og ríkisstjórn. Kvörtunin snerist um framferði stjórnvalda og skort á eftirfylgni við áður innleidd lög um neytendarétt og er það tekið skýrt fram í upphafi kvörtunar. Vart þarf að taka fram að við erum ósammála úrskurði ESA en stofnunin virðist í þessu ljósi hafa takmarkað gildi ef nokkuð fyrir óbreytta borgara og samtök þeirra. Þess má geta að Hæstiréttur hefur sannað svo ekki verður um villst að kvörtun yfir lögum 151/2010 átti svo sannarlega erindi við ESA þar sem þau opnuðu á íþyngjandi afturvirka vaxtaútreikninga á neytendalánum.