Óháð ráðgjafarþjónusta á fjármálamarkaði

Hagsmunasamtök heimilanna veita félagsmönnum óháða ráðgjöf í viðskiptum sínum á lánamarkaði. Við leggjum áherslu á réttindagæslu og lausnamiðaða þjónustu fyrir heimilin með áherslu á neytendavernd á fjármálamarkaði.

Einstaklingar geta því leitað til samtakanna ef greiðslubyrði lána er orðin íþyngjandi, réttarstaða þeirra er óljós eða lánveitendur veita ekki þá þjónustu sem viðkomandi þarfnast. Afstaða samtakanna er sú að heimilin eigi ekki að vera háð ráðgjöf eða afstöðu fjármálafyrirtækja í viðskiptum sínum enda eru þau ekki hlutlaus í þeirri afstöðu. Það er því nauðsynlegt að óháð ráðgjöf á fjármálamarkaði sé öllum aðgengileg. Við byggjum á þekkingu á lögum og reglum á sviði neytendaverndar á fjármálamarkaði og reynslu félagsmanna af eftirmálum gjaldþrota bankanna 2008.

Hafðu samband

Hægt er að senda fyrirspurn á póstfang Hagsmunasamtaka heimilanna og við svörum samdægurs eða næsta virka dag. Ráðgjafi okkar tekur einnig á móti fyrirspurnum á mánudögum og þriðjudögum kl. 10:00-13:00 í síma 546-1501. Við hvetjum félagsmenn til að nýta sér þennan viðtalstíma og ráðgjafarþjónustu samtakanna - heimilin@heimilin.is.

Kostnaðarþátttaka

Félagsmenn hafa greiðan aðgang að ráðgjöf en við hvetjum þá sem til okkar leita að greiða félagsgjald samtakanna. Félagsgjaldið er 4.900 krónur og valkvætt. Þetta fyrirkomulag hefur verið við lýði frá stofnun Hagsmunasamtaka heimilanna og greiðsluseðill er sendur í heimabanka félagsmanna einu sinni á ári. Aðild að samtökunum er því eins hagstæð og sveigjanleg og nokkur kostur er. 

Með aðild styður félagsmaður við óháða og gagnrýna rödd á fjármálamarkaði og ráðgjafarþjónustu samtakanna - Hér er hægt að skrá sig: Félagaskráning.

Frádráttarbær frjáls framlög

Hagsmunasamtök heimilanna eru almannaheillasamtök og fjölmenn samtök, því félagsmenn hafa verið yfir 8.000 talsins um langt árabil. Samtökin eru rekin að stærstum hluta fyrir félagsgjöld og að nokkru leyti opinbera styrki en við tökum einnig við frjálsum framlögum.  

Frjáls framlög einstaklinga að fjárhæð 10.000 - 350.000 kr. og framlög rekstraraðila allt að 1,5% af rekstrartekjum eru frádráttarbær frá tekjuskattsstofni.