Menu
RSS

Alvarleg afbrot kunna að hafa verið framin af sýslumanni

Hagsmunasamtök heimilanna taka undir ummæli Snorra Magnússonar, formanns Landssambands lögreglumanna, í morgunþætti Útvarps Sögu síðastliðinn föstudag. Snorri sagði þá að sér hefði verið brugðið eftir að hafa skoðað gögn frá tveimur aðilum og myndbandsupptöku annars þeirra af nauðungaruppboði á húsnæði hans hjá Sýslumanninum í Reykjavík. Gögnin gæfu vísbendingar um að málsmeðferð við nauðungarsölur þessar hefði verið með þeim hætti að um talsvert alvarleg lögbrot gæti verið að ræða af hálfu opinberra aðila, og ef það sem hann hefði séð væri ekki tilefni til lögreglurannsóknar þá vissi hann í raun og veru ekki hvað væri tilefni til lögreglurannsóknar.

Þessi ummæli vöktu talsverð viðbrögð, meðal annars þau að Sýslumaðurinn í Reykjavík sendi frá sér yfirlýsingu síðar sama dag þar sem ummælunum var vísað á bug. Yfirlýsing sýslumannsins er afar þversagnakennd svo vægt sé til orða tekið, og er þar meðal annars reynt að nota það sem rök að Snorri hafi tekið fram að hann hafi ekki rannsakað málið formlega. Að sjálfsögðu hefur formleg lögreglurannsókn ekki farið fram þar sem málið er nýtilkomið, og eru ummæli Snorra fullkomlega eðlileg þar sem hann er eingöngu að lýsa því viðhorfi að hann telji að slík rannsókn þurfi að hefjast. Eins og kom fram í umræddu viðtali hafði hann einmitt kynnt sér málið rækilega, og er því enginn fótur fyrir aðdróttunum sem koma fram í yfirlýsingu sýslumannsins um að það hafi hann ekki gert.

Sýslumaður heldur því einnig fram að ekki verði séð að Snorri hafi kynnt sér lög og reglur sem gilda um meðferð nauðungarsölumála, né greint frá því í hverju möguleg brot séu fólgin. Þessi ummæli í garð Snorra um að hann hafi kynnt sér mál og dregið af því ályktanir, án þess að kynna sér þau lög sem eiga við, eru bersýnilega út í hött og allt að því fjarstæðukennd. Ekki síst í ljósi þess að umrædd gögn koma frá landskunnum baráttumanni gegn óréttmætum nauðungarsölum, Sturlu Jónssyni. Sturla er þekktur fyrir það meðal annars að ganga um með útprentað eintak af lögum um nauðungarsölu næstum hvert sem hann fer, og eru því engar líkur á öðru en að Snorri hafi á þessum fundum fengið kynningu á þeim lögum og öðrum lögum sem eiga við um slík mál.

Fulltrúar á vegum Hagsmunasamtaka heimilanna hafa frá miðju ári 2010 gert ítarlegar rannsóknir á málsmeðferð við nauðungarsölur og fullnustugerðir hér á landi með hliðsjón af lögum á sviði neytendaréttar og þjóðréttarskuldbindingum Íslands. Niðurstöðum þeirra rannsókna hafa samtökin komið á framfæri með greinargerð um fullnustur án undangengins dóms. Í meginatriðum eru þær á þá leið að sú málsmeðferð brjóti í bága við reglur um neytendavernd sem eiga að gilda hér á landi vegna EES-samningsins, auk þess að ganga í berhögg við Mannréttindasáttmála Evrópu og ákvæði stjórnarskrárinnar um réttláta málsmeðferð. Hafi slíkt brot af hálfu embættismanns í för með sér velferðarmissi fyrir brotaþola getur það jafnframt verið refsivert með 2-16 ára fangelsisvist samkvæmt 2. mgr. 130. gr. almennra hegningarlaga ef sök sannast.

Fulltrúar samtakanna hafa líka kynnt sér gögn Sturlu Jónssonar, þau sem ummælin vísa til, og hafa komist að nákvæmlega sömu niðurstöðu og Snorri. Það er að segja að gögnin gefi sterkar vísbendingar um að alvarleg lögbrot kunni að hafa verið framin af fulltrúa sýslumanns við fyrirtöku og málsmeðferð í viðkomandi nauðungarsölumáli.

Nauðsynlegt er að stemma stigu við því óréttlæti og mannréttindabrotum sem eiga sér iðulega stað á skrifstofum sýslumanna og heimilum landsmanna þegar þar eru framkvæmd nauðungaruppboð. Þolendur slíkra brota eiga rétt á skaðabótum vegna þeirra, og hætta er á því að næstu misseri muni flóðbylgja slíkra skaðabótamála dynja á dómskerfinu verði ekkert að gert.

Jafnframt er samtökunum kunnugt um dæmi þess að slík brot hafa verið kærð til Alþjóða glæpadómstólsins, enda er mjög alvarlegt þegar þeir opinberu embættismenn sem eiga að standa vörð um réttindi fólks gera sér far um að brjóta gegn þeim. Að minnsta kosti eitt slíkt tilvik hefur nú þegar verið tekið til athugunar dómstólsins, sem metur hvort það skuli hljóta formlega meðferð.

Ráðamenn þjóðarinnar stæra sig gjarnan af því við hátíðleg tilefni að Ísland sé meðal fremstu landa heims á sviði mannréttinda og að hér sé til staðar öflugt réttarríki. Það skýtur því skökku við að hér skuli vera framin mannréttindabrot nánast daglega og það af opinberum embættismönnum. Hagsmunasamtök heimilanna hvetja stjórnvöld til að standa við stóru orðin og sýna það í verki að þeim sé alvara með slíkum yfirlýsingum, en þær séu ekki aðeins ætlaðar sem skrautfjaðrir.

Read more...

Húsfyllir á borgarafundi HH í Stapanum, Reykjanesbæ

Húsfyllir var á borgarafundi HH í Stapanum, Reykjanesbæ í gærkvöldi, undir yfirskriftinni "Fast er sótt á Suðurnesjamenn", þar sem fjallað var um stöðu heimila á Suðurnesjum.

Ólafur Arnarson, hagfræðingur stýrði fundinum. Frummælendur voru Árni Sigfússon bæjarstjóri í Reykjanesbæ, Þórólfur Halldórsson sýslumaður í Keflavík, Oddný Harðardóttir þingmaður Samfylkingar í suðurkjördæmi, og Ólafur Garðarsson formaður Hagsmunasamtaka heimilanna. Árni hóf fundinn og lagði í erindi sínu áherslu á að hið mikla atvinnuleysi á svæðinu væri undirrót vandans sem taka yrði á með því að efla atvinnulífið. Þórólfur Halldórsson fór yfir helstu niðurstöður skýrslu sem unnin var á vegum embættis sýslumannsins í Keflavík fyrir velferðarráðuneytið: Nauðungarsala íbúðarhúsnæðis á Suðurnesjum 2001–2011. Þórólfur vakti athygli á því að stór hluti þeirra sem misst hefðu húsnæði sitt á nauðungarsölum á þessu tímabili hefðu gert það aðeins 2-4 árum eftir kaup, sem vekti upp ýmsar spurningar m.a. varðandi lánveitingar. Oddný Harðardóttir talaði því næst um aðgerðir núverandi ríkisstjórnar vegna skuldavanda heimilanna. Oddný sagði það vera hlutverk þeirra sem kosnir yrðu á þing í vor að nýta það svigrúm sem núverandi ríkisttjórn hefði skapað með endurreisn efnahagslífsins eftir hrun, til frekari aðgerða fyrir heimilin. Síðastur frummælenda var Ólafur Garðarsson sem fjallaði í erindi sínu um skjaldborgina um fjármálakerfið. Hægt er að lesa erindi Ólafs í heild sinni hér.

Að loknum þessum erindum var komið að þátttakendum í pallborði að kynna hugmyndir framboða sinna til lausna á skuldavanda heimilanna, en í pallborði sátu fulltrúar allra framboða til Alþingiskosninganna í vor. Alls tólf framboð áttu þar fulltrúa; Samfylkingin, VG, Sjálfstæðisflokkur, Framsóknarflokkur, Hægri grænir, Björt framtíð, Dögun, Píratar, Alþýðufylkingin, Framfaraflokkurinn, Regnboginn og Flokkur heimilanna. Loks talaði sérstakur gestur fundarins, Vilhjálmur Birgisson formaður Verkalýðsfélags Akraness. Vilhjálmur sagði það sem ólíkindum að menn kæmust upp með umræðu eins og þá sem einkennt hefur verðtryggingarumræðuna. Þar er því blákalt haldið fram að ekkert sé hægt að gera fyrir heimilin sem tóku á sig gríðarlegar álögur í formi verðbóta sem bæst hafa við höfuðstól verðtryggðra lána frá hruni. Hundruðum milljarða var dælt í bankakerfið af stjórnvöldum eftir hrun, þeim hinum sömu og sáu ekkert því til fyrirstöðu að skattgreiðendur greiddu fyrir innstæður í Hollandi og Bretlandi þegar leita átti samninga vegna Icesave. Þegar hins vegar fram kemur krafa almennings um leiðréttingu lána er viðkvæðið alltaf það sama: "Peningarnir eru ekki til".

Að loknu erindi Vilhjálms tóku við fyrirspurnir fundarmanna, sem flestar beindust til frummælenda fundarins og fjölluðu m.a. um aðgerðarleysi stjórnvalda gagnvart skuldugum heimilum og framgöngu sýslumanna við framkvæmd fullnustugerða. Fundinum lauk með því að borin var upp tillaga stjórnar HH að ályktun fundarins:

"Borgarafundur HH í Stapa Reykjanesbæ fimmtudagskvöldið 21. mars tekur undir áskorun félagsfundar HH 7. mars 2013 til sýslumanna og annarra opinberra embættismanna sem hafa slík mál með höndum, að stöðva nú þegar allar fullnustugerðir á grundvelli ólöglegra lána. Á þeim hvílir sú skylda að rannsaka ávallt gaumgæfilega lögmæti þeirra lánasamninga og annarra gagna sem lögð eru fram vegna slíkra gjörninga. Allan vafa um lögmæti ber að túlka neytendum í hag og sökum þess aðstöðumunar sem er fyrir hendi hlýtur að teljast eðlilegt að sönnunarbyrði um lögmæti krafna hvíli á þeim sem halda þeim kröfum í frammi."

Ályktunin var samþykkt með lófataki.

Upptaka Hjara veraldar af fundinum mun birtast á vefnum um leið og eftirvinnslu lýkur.

Read more...

Opinn borgarafundur: Fast er sótt á Suðurnesjamenn

Hagsmunasamtök heimilanna standa fyrir opnum borgarafundi um málefni heimila á suðurnesjum í Stapanum , Reykjanesbæ fimmtudaginn 21. mars, kl. 20-22.

Fundarstjóri: Ólafur Arnarson, hagfræðingur.

Frummælendur: Árni Sigfússon bæjarstjóri Reykjanesbæjar, Þórólfur Halldórsson sýslumaður í Keflavík, Oddný Harðardóttir þingmaður í suðurkjördæmi og Ólafur Garðarsson formaður HH.

 

Sérstakur gestur: Vilhjálmur Birgisson, formaður Verkalýðsfélags Akraness.

Fulltrúum allra flokka sem bjóða fram til Alþingiskosninga er boðið til þátttöku í pallborðsumræðum.Staðfestir þátttakendur eru: Oddný Harðardóttir (Samfylking), Inga Sigrún Atladóttir (VG) Sigurður Ingi Jóhannsson (Framsókn), Ragnheiður Elín Árnadóttir (Sjálfst.fl.) Andrea J. Ólafsdóttir (Dögun), Guðmundur Franklín Jónsson (Hægri grænir), Þorvaldur Þorvaldsson (Alþýðufylkingin), Helgi Hrafn Gunnarsson (Píratar).

 

Allir velkomnir - Suðurnesjamenn fjölmennið !

 

 

 

Read more...

Alþingi

Gagnlegar upplýsingar

Leiðbeiningar í lánamálum heimilanna