Fjölmiðlar hafa verið eins og gengur, ófeimnir við að spyrja okkur hjá Hagsmunasamtökum heimilanna hversu margir munu taka þátt í komandi greiðsluverkfalli. Hingað til hafa svör okkar verið varfærin. Við vissum um stuðninginn innan samtakanna þar sem það voru í raun félagsmenn sem gáfu grænt ljós á greiðsluverkfallið í beinni kosningu um málið. Sú kosning fór fram í júní sl. með rafrænum hætti (77% þátttakenda sögðu já, 8% Nei og 14% sögðust hlutlausir). Hlutfall þeirra sem voru hinsvegar tilbúnir að taka sjálfir beinan þátt í aðgerðum var 36%. Margir gáfu því greiðsluverkfallinu atkvæði sitt þótt þeir væru ekki tilbúnir að vera beinir þátttakendur þ.e.a.s. þeir vildu ekki standa í vegi fyrir þeim sem voru tilbúnir að hefja aðgerðir. Við gerðum okkur grein fyrir að ef þátttökuhlutfallið endurspeglaðist hjá fólki utan samtakanna væri um að ræða óbærilegan þrýsting á stjórnvöld og handhafa fjármálavalds í landinu.
Stjórn HH átti þó erfitt með að meta væntanlega þátttöku út frá félagsmönnum því færa mátti rök fyrir því að félagsmenn væru viljugri til þátttöku en aðrir. Þetta má til sanns vegar færa en ekki með jafn afgerandi hætti og margur gætu haldið. 30% þátttakenda (yfir 75 þúsund af 250 þúsund) í könnun Capacent eru tilbúin í tímabundið greiðsluverkfall. 16% þátttakenda þ.e. um 40 þúsund manns eru tilbúin að fara í langtíma greiðsluverkfall.
Til samanburðar eru 30% félagsmanna HH tilbúnir í langtíma greiðsluverkfall og 36% í tímabundið greiðsluverkfall. Við þetta má bæta að 87% þátttakenda í Capacent könnuninni vilja taka þátt í að þrýsta á stjórnvöld til aðgerða í þágu heimilanna. 39,7% eru tilbúin að taka fjármuni úr ríkisbönkum (99 þúsund manns).
Þessar niðurstöður úr könnuninni sem Capacent framkvæmdi eru væntanlega sláandi fyrir marga. Stjórn Hagsmunasamtaka heimilanna líkir þessum aðgerðum við kjarabaráttu síðustu aldar. Línan hefur verið dregin í sandinn, almenningur er tilbúinn að standa saman fyrir mannsæmandi lánakjörum og hrinda órétti. Forsætisráðherra, Samtökum fjármálafyrirtækja og Landssambandi lífeyrissjóða hefur verið boðið að samningaborðinu. Hagsmunasamtök heimilanna vilja leiðréttingu á stökkbreyttum höfuðstólum, endurskoðun á verðbreytingarákvæðum íbúðalána og sambærileg vaxtakjör og bjóðast í nágrannalöndunum. Stjórnvöld munu framvegis gjöra svo vel og stýra ríkisfjármálum og hagkerfinu almennt með ábyrgum hætti og hætta að fela óráðsíu og vaxtaokur með blekkjandi flóknum fjármálaafurðum eins og verðtryggingu. Hinn valkosturinn er að láta reyna á samstöðu heimilanna.
Sjá ofangreindan hluta Capacent könnunar hér.
Ofangreinda könnun HH meðal félagsmanna má skoða hér.
Hins vegar hefur greiðsluverkfall þann ókost að setja þann er þátt tekur í þá aðstöðu að eiga undir högg að sækja lagalega varðandi skuldbindingar sínar við banka og fjármálastofnanir.
Til er hins vegar fullkomlega lögleg aðferð til að sýna fjármála og stjórnmálamönnum svo ekki verði um villst hverjir hafi hin raunverulegu völd í fjármálaheiminum : almenningur hverrar þjóðar.
Sú fullkomlega löglega aðgerð að 75000 eða fleiri einstaklingar loki bankareikningum, taki út allt sitt reiðufé, hætti að nota kredit- og debetkort, setur bankastofnanir beinustu leið á hausinn í hvelli vegna áhrifa bindiskyldu á fjármagn þeirra. Allt fjármagn mun þannig þurrkast upp í bankastofnunum á svipstundu og þeir munu ekki með nokkru móti geta staðið við skuldbindingar sínar.
Einstaklingar sem þannig vega að fjármála og bankakerfinu leggja sig sjálfa ekki í neina lagalega hættu, og munu ekki eiga á hættu að þurfa að bera af slíku athæfi neinn aukakostnað.
Stjórnmála- og fjármálamenn myndu grátbiðja almenning að hætta þessu hið snarasta.
Aðgerð sem þessi myndi skila árangri strax í formi vilja stjórnmálamanna til þess að semja við skuldara, þar sem alls ekki er um neinar ólöglegar aðgerðir að ræða, einungis óvéfengjanlegt sýnishorn af valdi hins almenna borgara.
Þeir sem vilja fræðast meira um aðferð sem þessa er bent á eftirfarandi hlekk : http://kritor.blog.is/blog/stjornmal_og_sa/entry/869802/
Baráttukveðja.
Auðmenn hafa margir hverjir náð sínu fram í krafti stærðar sinnar. Almenningur verður að sameinast til að ná fram sambærilegum þunga. Láta nú af þrælsótta og sýna samstöðu. Þetta er þegar farið að hafa áhrif, en yfirvöld keppast nú við að finna leið til að sætta almenning.....tilraunir Árna Páls og co virka samt því miður eins og ,,bein í soltinn hundskrjaft" því ennþá er bara unnið með greiðslubyrði en ekki höfuðstólinn. Því megum við hvergi hvika og krefjast réttlátri leiðréttingu á skuldum heimilanna....munum að sameinuð komumst við á leiðarenda!
og er stjórnarskrárvarinn réttur almennings til að auðsýna andstöðu við stjórnvöld og óréttlátar stjórnvaldsákvarðanir sem ósjaldan hafa sérhagsmuni fárra að leiðarljósi.
Þegar þeim ofbýður vestra góðum US-þegnum sem hafa að kjörorði frelsi og hugrekki hefur reynst þeim einna best í seinni tíð
að ganga út og mótmæla annan daginn, senda tölvupóst hinn daginn og hætta ekki fyr en almannahagur hefur sigur.
Þar þekkja allir uppskriftina: það er fjöldinn sem gildir - samstaðan, fjöldinn og fréttagildi aðgerða í þágu almannahags.
Ég hef ekki mikla trú á að þetta seti nokkurn þrýsting á stjórnvöld. Því miður :( Það þarf eitthvað miklu róttækara til að hreyfa við þessu kerfi mammons :( En það kemur á endanum. Þetta gengur náttúrulega ekki eins og það er. Kerfið er meingallað. Svo gallað að það verður óstarfhæft innan skamms. Þarf engin greiðsluverkföll til. Þetta er sem betur fer að hrynja. Já bankahrunið er ekkert hafið fyrir alvöru trúið mér.