Hagsmunasamtök heimilanna og Húseigendafélagið
skora á
verkalýðshreyfinguna
___________________________
Ofangreind hagsmunasamtök, skora á launþegasamtök og verkalýðsfélög landsins að taka afgerandi stöðu með heimilunum í landinu vegna gríðarlegs og hratt vaxandi fjárhagsvanda þeirra, sem er m.a. afleiðing ófyrirsjáanlegra, óeðlilegra og jafnvel ólöglegra hækkana á gengis- og verðtryggðum veðlánum heimilanna í kjölfar efnahagshrunsins.
Um 42% heimila eru með bága eða neikvæða eiginfjárstöðu skv. gögnum Seðlabanka Íslands frá síðustu áramótum. Allt bendir til að efnahagur þeirra hafi versnað enn frekar frá áramótum og muni halda áfram á þeirri voðabraut, nema gripið verði inn í með almennri leiðréttingu lánanna. Um 25% heimila landsins eru með gengistryggð veðlán og um 90% þeirra eru í tímabundinni frystingu. Umsóknum Íbúðarlánasjóðs vegna greiðsluerfiðleika hefur fjölgað um 900% á milli ára.
Forsendur verð- og gengistryggðra lána eru brostnar og þeim heimilum fjölgar ískyggilega hratt sem geta ekki staðið í skilum eða sjá hvorki tilgang né skynsemi í að greiða af lánum sem hækka stjórnlaust úr öllu valdi . Kaupmáttur rýrnar óðum og atvinnuleysi er í sögulegum hæðum, sem leiðir til samdráttar í einkaneyslu, sem eykur svo atvinnuleysið enn frekar.
Með samhentu átaki má rjúfa þennan vítahring og snúa þessari óheillaþróun við. Aukið fjárhagslegt svigrúm heimilanna mun fljótt efla atvinnulífið, draga úr atvinnuleysi og styrkja afkomu fjármálakerfis, sveitarfélaga og ríkissjóðs.
Undirrituð samtök skora á launþegahreyfingar landsins að knýja á stjórnvöld og kalla eftir tafarlausum almennum leiðréttingum á gengis-og verðtryggðum lánum heimilanna. Í þessu samhengi er vert að benda á nýlega kynnta sáttartillögu talsmanns neytenda vegna sama vanda.
Skráðir félagar í ofangreindum samtökum eru samtals um 11.000.
________________________________________
Reykjavík, 30.apríl 2009
Virðingarfyllst,
f.h. Hagsmunasamtaka heimilanna f.h. Húseigendafélagsins
Þórður B. Sigurðsson formaður. Sigurður Helgi Guðjónsson formaður.
Hreinlega auglýsi eftir ,,skjaldborg um heimilin!!!"
Ekki nægjanlegt að tala - þarf að framkvæma!!
Jóhanna - koma nú - setja ,,rass-mótorinn" í gang!!!!
Nú er nóg komið, ég skora á þessar þúsundir eða tugþúsundir manna sem eru að horfast í augu við það að lán þeirra hafa hækkað meira en nokkur rök eru fyrir að taka höndum saman. Berjum fast að dyrum hjá ríkisstjórninni og ef það ekki dugar getum við látið þau finna fyrir eigin meðali....búsáhöld og skyr.
Þetta er rán ! og ánauð!
Ætlast þeir virkilega til að við sættum okkur við alla þessa skuldaraukningu á sama tíma og verðlag hækkar á mat og nauðsinnum?
Og þúsundir hafa misst vinnuna ?
Það er ekkert vit í að borga af þessum lánum ,fjöldagjaldþrot og landsflótti virðist vera framtíðin